ദുബായ് : ടോസ്റ്റ്മാസ്റ്റേഴ്സ് ഇന്റർനാഷണലിന്റെ കീഴിലുള്ള അക്കാഫ് ടോസ്റ്റ്മാസ്റ്റേഴ്സ് ക്ലബ്ബിന്റെ പുതിയ ഭാരവാഹികളുടെ സ്ഥാനാരോഹണ ചടങ്ങ് നടന്നു. പ്രസംഗ പരിശീലനത്തിനും നേതൃത്വപാടവ വികസനത്തിനുമുള്ള ലോകത്തിലെ പ്രമുഖ സ്ഥാപനമാണ് ടോസ്റ്റ്മാസ്റ്റേഴ്സ് ഇന്റർനാഷണൽ. അക്കാഫ് പ്രസിഡന്റ് ചാൾസ് പോൾ, ഭാരവാഹികളായ ജൂഢിൻ ഫെർണാണ്ടസ്, അനൂപ് അനിൽ ദേവൻ, അഡ്വ. ആഷിഖ് തയ്യിക്കണ്ടി, മനോജ് കെ.വി, രഞ്ജിത്ത് കോടൊത്ത് എന്നിവർ ആശംസകൾ നേർന്നു. ചടങ്ങിൽ സംസാരിച്ച അക്കാഫ് പ്രസിഡന്റ് ചാൾസ് പോൾ, അക്കാഫിന്റെ ഏറ്റവും മികച്ച സംരംഭങ്ങളിലൊന്നാണ് ടോസ്റ്റ്മാസ്റ്റേഴ്സ് ക്ലബ്ബെന്നും, നിരവധി മികച്ച പ്രഭാഷകരെയും ആത്മവിശ്വാസമുള്ള നേതാക്കളെയും സമൂഹത്തിന് സംഭാവന ചെയ്യാൻ ഈ വേദിക്ക് കഴിഞ്ഞിട്ടുണ്ടെന്നും പറഞ്ഞു. വ്യക്തിത്വ വികസനത്തിനും ആശയവിനിമയ മികവിനും നേതൃത്വം വളർത്തുന്നതിനും ഈ ക്ലബ്ബ് വലിയ പങ്കുവഹിച്ചിട്ടുണ്ടെന്നും അദ്ദേഹം കൂട്ടിച്ചേർത്തു.
ടോസ്റ്റ്മാസ്റ്റേഴ്സ് ഇന്റർനാഷണലിനെ പ്രതിനിധീകരിച്ച് ശ്രദ്ധ ജെയിംസ്, നജില, മുഹമ്മദ് ആഷിഖ്, നിധിൻ ജോർജ് എന്നിവർ ചടങ്ങിൽ പങ്കെടുത്തു. ഇൻസ്റ്റലേഷൻ ഓഫീസർ വിജി ജോൺ പുതിയ ഭാരവാഹികൾക്ക് സത്യവാചകം ചൊല്ലിക്കൊടുത്തു. മുൻ പ്രസിഡന്റ് ഷെഫി അഹമ്മദ് പരിപാടികൾക്ക് നേതൃത്വം നൽകി. തുടർന്ന് അംഗങ്ങളുടെ കലാപരിപാടികളും അരങ്ങേറി. രമൽ നാരായണൻ (പ്രസിഡന്റ്), ആശ സിയാദ്, ശ്രീജ പാറമ്മൽ, സപ്ന ഗോപിനാഥ് (വൈസ് പ്രസിഡന്റുമാർ) റൈജ മനോജ് (ട്രഷറർ) ലേഖ വിജയദാസ് (സെക്രട്ടറി) റോഷൻ കൂട്ടുങ്ങൽ (സെർജെന്റ് അറ്റ് ആംസ്) എന്നിവരാണ് പുതിയ ഭാരവാഹികൾ.
ടോസ്റ്റ്മാസ്റ്റേഴ്സ് ഇന്റർനാഷണലിന്റെ കീഴിലുള്ള യുഎഇയിലെ മികച്ച ക്ലബ്ബുകൾക്ക് നൽകുന്ന ‘ക്ലബ് എക്സലൻസ് അവാർഡ്’ ഉൾപ്പെടെ അഞ്ച് പി.ആർ. അവാർഡുകളും, ‘സ്മെഡ്ലി ഡിസ്റ്റിംഗിഷ്ഡ് ക്ലബ് ” എന്ന അംഗീകാരവും കഴിഞ്ഞ വർഷത്തിൽ അക്കാഫ് ടോസ്റ്റ്മാസ്റ്റേഴ്സ് ക്ലബ്ബ് സ്വന്തമാക്കിയിട്ടുണ്ട്. അക്കാഫ് ടോസ്റ്റ് മാസ്റ്റർ ക്ലബ്ബ് മലയാളം, ഇംഗ്ലീഷ് ഭാഷകളിൽ പരിശീലനം നൽകുന്ന ദ്വിഭാഷ സ്ഥാപനമാണ്. അക്കാഫ് ടോസ്റ്റ്മാസ്റ്റേഴ്സ് ക്ലബ്ബിൽ അംഗത്വം ആഗ്രഹിക്കുന്നവർ: 056 664 6286 എന്ന നമ്പറിൽ ബന്ധപ്പെടാവുന്നതാണ്.