ലോസ് ആഞ്ചലസ്– ഫിഫ ലോകകപ്പ് പോരാട്ടങ്ങളിൽ അപ്രതീക്ഷിത ഫലങ്ങളും ആവേശപ്പോരാട്ടങ്ങളും തുടരുന്നു. കരുത്തരായ ബെൽജിയത്തെ ഇറാൻ സമനിലയിൽ തളച്ചപ്പോൾ, ഉറുഗ്വായെ ഞെട്ടിച്ച് കേപ് വേർദെയും സമനില പിടിച്ചു. മറ്റൊരു മത്സരത്തിൽ ന്യൂസിലാൻഡിനെ തകർത്ത് ഈജിപ്ത് ഗ്രൂപ്പിൽ തങ്ങളുടെ ആധിപത്യം ഉറപ്പിച്ചു.
ബെൽജിയത്തെ പൂട്ടി ഇറാൻ
ലോസ് ആഞ്ചലസ് സ്റ്റേഡിയത്തിൽ നടന്ന മത്സരത്തിൽ ഫിഫ റാങ്കിംഗിൽ 10-ാം സ്ഥാനത്തുള്ള കരുത്തരായ ബെൽജിയത്തെ 22-ാം സ്ഥാനക്കാരായ ഇറാൻ ഗോൾരഹിത സമനിലയിൽ തളച്ചു (0-0). മത്സരത്തിൽ 70 ശതമാനത്തോളം പന്തടക്കത്തിലും ആക്രമണത്തിലും ബെൽജിയം മുന്നിട്ടുനിന്നെങ്കിലും ഇറാന്റെ പ്രതിരോധക്കോട്ട തകർക്കാൻ അവർക്കായില്ല. ബെൽജിയം 23 ഷോട്ടുകൾ ഉതിർത്തപ്പോൾ ഇറാൻ 7 ഷോട്ടുകളുമായി തിരിച്ചടിച്ചു. മത്സരത്തിന്റെ 66-ാം മിനിറ്റിൽ ബെൽജിയം താരം നെതൻ എൻഗോയ് ചുവപ്പ് കാർഡ് കണ്ട് പുറത്തായത് ടീമിന് തിരിച്ചടിയായി. ഇറാന്റെ മെഹ്ദി താരെമി വലകുലുക്കിയെങ്കിലും വാർ (VAR) പരിശോധനയിൽ അത് ഓഫ്സൈഡാണെന്ന് കണ്ടെത്തി ഗോൾ നിഷേധിക്കുകയായിരുന്നു. ഇറാന്റെ ഗോൾകീപ്പർ അലി റസെ ബെയ്റാൻവാൻഡിന്റെ മികച്ച പ്രകടനമാണ് ബെൽജിയത്തെ വിജയത്തിൽ നിന്നും തടഞ്ഞത്.
ഈജിപ്തിന് തകർപ്പൻ ജയം
നിർണായക മത്സരത്തിൽ ന്യൂസിലാൻഡിനെ ഒന്നിനെതിരെ മൂന്ന് ഗോളുകൾക്ക് തകർത്ത് ഈജിപ്ത് ഗ്രൂപ്പ് ജി-യിൽ നിയന്ത്രണം ഏറ്റെടുത്തു. മത്സരത്തിന്റെ 15-ാം മിനിറ്റിൽ ഫിൻ സർമാനിലൂടെ ന്യൂസിലാൻഡ് ആണ് ആദ്യം ലീഡെടുത്തത്. ആദ്യ പകുതിയിൽ ഒരു ഗോളിന് പിന്നിൽ ആയ ശേഷം മൂന്നു ഗോളുകൾ തിരിച്ചടച്ച് ശക്തമായി തിരിച്ചുവരുകയായിരുന്നു ഈജിപ്ത്. 58-ാം മിനിറ്റിൽ ഹെഡ്ഡറിലൂടെ മുസ്തഫ സിക്കോ ഈജിപ്തിന് സമനില സമ്മാനിച്ചു. 67-ാം മിനിറ്റിൽ സൂപ്പർ താരം മുഹമ്മദ് സലാ ഈജിപ്തിനെ മുന്നിലെത്തിച്ചു. ഒടുവിൽ 82-ാം മിനിറ്റിൽ സലായുടെ അസിസ്റ്റിൽ ട്രെസെഗെക്കൂടി ഗോൾ നേടിയതോടെ ഈജിപ്ത് 3-1 ന്റെ ആധികാരിക വിജയം സ്വന്തമാക്കി. ഈ വിജയത്തോടെ രണ്ട് മത്സരങ്ങളിൽ നിന്ന് 4 പോയിന്റുമായി ഈജിപ്ത് ഗ്രൂപ്പിൽ ഒന്നാം സ്ഥാനത്താണ്. രണ്ട് സമനിലകളുമായി ഇറാനും ബെൽജിയവും യഥാക്രമം രണ്ടും മൂന്നും സ്ഥാനങ്ങളിൽ നിൽക്കുമ്പോൾ ഒരു പോയിന്റുള്ള ന്യൂസിലാൻഡ് അവസാന സ്ഥാനത്താണ്.
ഉറുഗ്വായെ ഞെട്ടിച്ച് കേപ് വേർദെ; ഗ്രൂപ്പ് എച്ചിൽ പോരാട്ടം മുറുകുന്നു
ഗ്രൂപ്പ് എച്ചിലെ ആവേശകരമായ മത്സരത്തിൽ മുൻ ചാമ്പ്യന്മാരായ ഉറുഗ്വായെ കേപ് വേർദെ 2-2 എന്ന സമനിലയിൽ തളച്ചു. മത്സരത്തിന്റെ 21-ാം മിനിറ്റിൽ ഡയറക്ട് ഫ്രീകിക്കിലൂടെ കെവിൻ പിനയിലൂടെ കേപ് വേർദെയാണ് ആദ്യം മുന്നിലെത്തിയത്. എന്നാൽ ആദ്യ പകുതിയുടെ അവസാന നിമിഷങ്ങളിൽ മാക്സി അരാഹോ (44′), അഗസ്റ്റിൻ കനോബിയോ (45+6′) എന്നിവരിലൂടെ ഉറുഗ്വായ് രണ്ട് ഗോൾ മടക്കി കളിയിലേക്ക് ശക്തമായി തിരിച്ചുവന്നു. തുടർന്ന് രണ്ടാം പകുതിയിൽ പകരക്കാരനായി ഇറങ്ങിയ ഹീലിയോ വരേല 61-ാം മിനിറ്റിൽ നേടിയ ഗോളിലൂടെ കേപ് വേർദെ ഉറുഗ്വായുടെ വിജയപ്രതീക്ഷകൾ തല്ലിക്കെടുത്തി സമനില പിടിച്ചെടുക്കുകയായിരുന്നു. ഗ്രൂപ്പ് എച്ചിൽ നിലവിൽ 4 പോയിന്റോടെ സ്പെയിൻ ആണ് ഒന്നാമത്. രണ്ട് സമനിലകളുമായി ഉറുഗ്വായും കേപ് വേർദെയും രണ്ടും മൂന്നും സ്ഥാനങ്ങളിൽ തുടരുന്നു. ഒരു പോയിന്റുള്ള സൗദി അറേബ്യയാണ് ഗ്രൂപ്പിൽ നാലാമത്.