ഇന്‍ഡോര്‍– ഹണിമൂണിനിടെ ഭര്‍ത്താവിനെ കൊലപ്പെടുത്തിയത് 20 ലക്ഷം രൂപയ്ക്ക് ക്വട്ടേഷന്‍ നല്‍കിയാണെന്ന് പോലീസ്. പൂര്‍വഖാസി ജില്ലയില്‍ കാഴ്ചകള്‍ കണ്ടു നടക്കുന്നതിനിടെ കണ്മുമ്പിലിട്ട് ഭര്‍ത്താവിനെ കൊല്ലാന്‍ സൗകര്യം ചെയ്ത് കൊടുത്തതും സോനം തന്നെയാണെന്ന് റിപ്പോര്‍ട്ട്. ക്വട്ടേഷന്റെ ആദ്യ ഗഡുവായി 15000 രൂപയാണ് കൊലയാളികള്‍ക്ക് കൈമാറിയത്. കൊല നടക്കുമ്പോള്‍ ഈ പണം ഭര്‍ത്താവിന്റെ പേഴ്‌സില്‍ എടുത്ത് കൊടുക്കുകയായിരുന്നെന്നും പോലീസ് വെളിപ്പെടുത്തി.
ജൂണ്‍ 10നാണ് ഉത്തര്‍പ്രദേശിലെ ഗാസിപൂരില്‍ നിന്ന് സോനത്തെ പോലീസ് പിടികൂടിയത്. കാമുകനെന്ന് പറയപ്പെടുന്ന രാജ് ഖുഷ്‌വാഹയേയും മൂന്ന് വാടക കൊലയാളികളെയും മധ്യപ്രദേശില്‍ നിന്നും ഉത്തര്‍പ്രദേശില്‍ നിന്നും പോലീസ് പിടികൂടിയിരുന്നു. കൊലപാതകത്തില്‍ തനിക്ക് പങ്കില്ലെന്നാണ് കാമുകന്‍ രാജ്‌സിങ് ഖുഷ്വാഹ പോലീസിനി മൊഴി നല്‍കിയത്. ഭര്‍ത്താവിനെ കൊലപ്പെടുത്താനുള്ള സോനത്തിന്റെ പദ്ധതിയെ പിന്തുണച്ചിരുന്നില്ല. പിടിയിലായ മൂന്ന് പേരോടും മേഘാലയിലേക്ക് പോകരുതെന്ന് ആവശ്യപ്പെട്ടിരുന്നു. മേഘാലയ കാണാനുള്ള ആഗ്രഹത്തിലാണ് അവര്‍ പോയത്. തന്റെ യാത്ര അവസാന നിമിഷത്തില്‍ വേണ്ടെന്ന് വെക്കുകയായിരുന്നു. കൊലപാതകം നടത്താന്‍ പിടിയിലായ മൂന്ന് പേരും തയാറായിരുന്നില്ല. കൂടുതല്‍ പണവും മറ്റും വാഗ്ദാനം ചെയ്ത് സോന അവരെ കൊല ചെയ്യാന്‍ നിര്‍ബന്ധിച്ചതാണെന്ന് രാജ് സിങ് ഖുഷ്വാഹ പോലീസിനോട് വെളിപ്പെടുത്തി.
എന്നാല്‍ ഇയാളുടെ മൊഴി പോലീസ് പൂര്‍ണമായും വിശ്വാസത്തിലെടുത്തിട്ടില്ല. സോനത്തിന്റെ ഫാക്ടറിയിലെ ജീവനക്കാരനാണ് രാജ് ഖുഷ്വാഹ. ഫാക്ടറിയില്‍ സന്ദര്‍ശനത്തിനെത്തുന്ന വേളയിലാണ് തന്നേക്കാള്‍ അഞ്ചു വയസ്സിന് ഇളയവനായ ഖുഷ്വാഹയുമായി സോന പ്രണയത്തിലായതെന്ന് പോലീസ് നിഗമനം. രാജ് സിങ് നിരപരാധിയാണെന്നാണ് അമ്മ ചുന്നി ദേവിയും സോനത്തിന്റെ അച്ഛന്‍ ദേവി സിങ്ങും പറയുന്നത്. ഇരുവരും പ്രണയത്തിലാണെന്ന വാര്‍ത്തയും ഇവര്‍ നിഷേധിച്ചു. മേയ് 11നായിരുന്നു സോനയുടെയും രാജയുടെയും വിവാഹം. ഹണിമൂണ്‍ യാത്രക്കായി മേഘാലയില്‍ എത്തിയ ഇവരെ മേയ് 23ന് ചിറാപുഞ്ചിയിലെ സൊഹ്‌റ പ്രദേശത്താണ് അവസാനമായി കണ്ടത്. 11 ദിവസങ്ങള്‍ക്ക് ശേഷം ജൂണ്‍ 2ന് സൊഹ്‌റയിലെ വീസവ്‌ഡോങ് വെള്ളച്ചാട്ടത്തിനടുത്തെ മലയിടുക്കില്‍ നിന്നാണ് രാജ രഘുവംശിയുടെ മൃതദേഹം കണ്ടെത്തിയത്.