അബഹ – ബീശയിലെ വാദി ജഅ്ബയില്‍ കുത്തിയൊലിക്കുന്ന മലവെള്ളപ്പാച്ചിലില്‍ പെട്ട കാറില്‍ കുടുങ്ങിയ നാലു യുവാക്കളെ കൂറ്റന്‍ ഷെവല്‍ ഉപയോഗിച്ച് സൗദി പൗരന്‍ സാഹസികമായി രക്ഷപ്പെടുത്തി. ഷെവലിന്റെ മുന്‍വശത്ത് പിടിച്ചുകയറാന്‍ സിവില്‍ ഡിഫന്‍സ് ഉദ്യോഗസ്ഥര്‍ യുവാക്കളെ സഹായിച്ചു. ശക്തമായ കുത്തിയൊഴുക്കുള്ള വെള്ളത്തില്‍ നിന്ന് യുവാക്കളെ സുരക്ഷിതമായി രക്ഷിക്കാന്‍ ഇവര്‍ക്ക് സാധിച്ചു. യുവാക്കളെ ഷെവല്‍ ഉപയോഗിച്ച് രക്ഷിച്ച് നിമിഷങ്ങള്‍ക്കകം വെള്ളത്തില്‍ മുങ്ങിയ ഇവരുടെ കാര്‍ ഒഴുക്കില്‍ പെട്ട് പലതവണ കരണം മറിഞ്ഞു. ഇതിന്റെ ദൃശ്യങ്ങള്‍ അടങ്ങിയ വീഡിയോ സാമൂഹികമാധ്യമങ്ങളില്‍ പ്രചരിക്കുന്നുണ്ട്.
രക്ഷാപ്രവര്‍ത്തനത്തിന് സാക്ഷികളാകാന്‍ നിരവധി പേര്‍ പ്രദേശത്ത് എത്തിയിരുന്നു. മറ്റൊരു സംഭവത്തില്‍, മദീനയിലെ വാദി അല്‍വജബില്‍ മലവെള്ളപ്പാച്ചിലില്‍ പെട്ട കാറില്‍ കുടുങ്ങിയ നാലു പേരെ സിവില്‍ ഡിഫന്‍സ് അധികൃതര്‍ രക്ഷപ്പെടുത്തി. ഗതാഗത നിയമം ലംഘിച്ച് മലവെള്ളപ്പാച്ചിലിനിടെ താഴ്‌വര മുറിച്ചുകടക്കാന്‍ ശ്രമിച്ച ഡ്രൈവര്‍ക്കെതിരെ ട്രാഫിക് പോലീസുമായി ഏകോപനം നടത്തി പിഴ ചുമത്തിയതായി സിവില്‍ ഡിഫന്‍സ് അറിയിച്ചു. ക്യാപ്.ബീശയിലെ വാദി ജഅ്ബയില്‍ മലവെള്ളപ്പാച്ചിലില്‍ പെട്ട കാറില്‍ കുടുങ്ങിയ യുവാക്കളെ ഷെവല്‍ ഉപയോഗിച്ച് രക്ഷപ്പെടുത്തുന്നു.