ദുബായിലെ യുവ ഡോക്ടർ മയക്കുമരുന്നുമായി പിടിയിലായി

കൽപ്പറ്റ- ദുബായിയിലെ യുവഡോക്ടർ വാഹന പരിശോധനക്കിടെ മയക്കുമരുന്നുമായി പിടിയിലായി. 160.77 ഗ്രാം മെത്താഫിറ്റമിനുമായാണ് കൊല്ലം കരുനാഗപ്പള്ളി തഴവ ചിറ്റുമൂല ഇടമരത്തു വീട്ടിൽ ഡോ.എൻ. അൻവർ ഷാ (32) അറസ്റ്റിലായത്. മൈസൂരുവിൽ നിന്നു പൊന്നാനിയിലേക്കുള്ള ബസ് യാത്രയ്ക്കിടെ മുത്തങ്ങ എക്സൈസ് ചെക്പോസ്റ്റിലാണ് ഇയാൾ പിടിയിലായത്.

ബെംഗളൂരുവിൽ നിന്നു വാങ്ങിയ ലഹരിമരുന്ന് വിൽപനയ്ക്കായി കൊച്ചിയിലേക്കു കൊണ്ടു പോവുകയായിരുന്നുവെന്ന് എക്സൈസ് ഉദ്യോഗസ്ഥർ പറഞ്ഞു. പിടിച്ചെടുത്ത മെത്താഫിറ്റമിന് 5 ലക്ഷം രൂപ വിലവരും. ദുബായിൽ ആയുർവേദ ചികിത്സാകേന്ദ്രം നടത്തുന്ന അൻവർ ഷാ അഞ്ചു മാസം മുമ്പാണ് നാട്ടിലെത്തിയത്. ഇയാൾ ദുബായിലും ലഹരിക്കേസുകളിൽ പിടിയിലായിരുന്നുവെന്ന് അധികൃതർ പറഞ്ഞു.