ആലപ്പുഴ: ആലപ്പുഴയിലെ ജനങ്ങളോട് തീര്‍ത്താല്‍ തീരാത്ത കടപ്പാടാണ് തനിക്കുള്ളതെന്ന് കെ.സി.വേണുഗോപാല്‍. ആലപ്പുഴ മണ്ഡലത്തില്‍ നേടിയ വിജയത്തിന് ശേഷം മാധ്യമങ്ങളോട് പ്രതികരിക്കുകയായിരുന്നു അദ്ദേഹം. 2014-നു ശേഷം പത്തുവര്‍ഷത്തെ ഇടവേളയ്ക്കുശേഷമാണ് താന്‍ ആലപ്പുഴയില്‍ മത്സരിക്കാനെത്തുന്നത്. ഒട്ടും പ്രതീക്ഷിക്കാതെയാണ് പാര്‍ട്ടി എന്നോട് മത്സരിക്കാന്‍ ആവശ്യപ്പെട്ടത്. അത് ആലപ്പുഴയിലെ ജനങ്ങള്‍ ഒരുപാട് ആഗ്രഹിച്ചിരുന്നുവെന്ന് എനിക്കറിയാം. ദേശീയതലത്തില്‍ ഒരുപാട് ഉത്തരവാദിത്വങ്ങളാണ് പാര്‍ട്ടി എന്നെ ഏല്‍പ്പിച്ചിരുന്നത്. കഴിഞ്ഞ ഒന്നുരണ്ടു വര്‍ഷക്കാലമായി ആ ദൗത്യവുമായി മുന്നോട്ടുപോകുന്നതിനിടയിലാണ് ലോക്‌സഭാ തിരഞ്ഞെടുപ്പില്‍ മത്സരിക്കാന്‍ പാര്‍ട്ടി എന്നോട് ആവശ്യപ്പെട്ടത്. അതുകണ്ട് കുറെയേറെ സമയം എനിക്ക് ആലപ്പുഴയില്‍ ചിലവഴിക്കാനോ ഒരുപാട് ആളുകളെ കാണാനോ എനിക്കായില്ല. എങ്കിലും പതിവുപോലെ എല്ലാഘട്ടങ്ങളിലും എന്നെ സഹായിച്ച ആലപ്പുഴ, ഇപ്പോഴും വളരെ നല്ലരീതിയില്‍ സഹായിച്ചതിന് എനിക്ക് ആലപ്പുഴയിലെ ജനങ്ങളോട് നന്ദിയുണ്ട്. തീര്‍ത്താല്‍ തീരാത്ത കടപ്പാടുമായാണ് ജനങ്ങള്‍ക്ക് മുന്നില്‍ നില്‍ക്കുന്നത്. യു.ഡി.എഫ്. പ്രവര്‍ത്തകരോടും നന്ദിരേഖപ്പെടുത്തുന്നെന്നും അദ്ദേഹം പറഞ്ഞു.
ഏറ്റവും പുതിയ വാർത്തകൾ വാട്സാപ്പിൽ ലഭിക്കാൻ Join Our WhatsApp Group