സന്‍ആ – യെമന്‍ തലസ്ഥാനമായ സന്‍ആയില്‍ ഹൂത്തി നിയന്ത്രണത്തിലുള്ള കോടതി വിദേശ സര്‍ക്കാരുകള്‍ക്കായി ചാരവൃത്തി നടത്തിയതിന് 17 പേരെ കുറ്റക്കാരായി കണ്ടെത്തി വധശിക്ഷക്ക് വിധിച്ചു. യെമനില്‍ പ്രവര്‍ത്തിക്കുന്ന വിദേശ ഏജന്‍സികളിലെ പ്രാദേശിക ജീവനക്കാര്‍ക്കെതിരെ വര്‍ഷങ്ങളായി ഹൂത്തികള്‍ നടത്തുന്ന അടിച്ചമര്‍ത്തല്‍ നടപടികളിലെ ഏറ്റവും പുതിയ സംഭവമാണിത്. സന്‍ആയിലെ പ്രത്യേക ക്രിമിനല്‍ കോടതി ശനിയാഴ്ച വിധി പ്രസ്താവിച്ചതായി ഹൂത്തികള്‍ നടത്തുന്ന സബ വാര്‍ത്താ ഏജന്‍സി റിപ്പോര്‍ട്ട് ചെയ്തു.
ശിക്ഷിക്കപ്പെട്ട ആളുകള്‍ അമേരിക്കന്‍, ഇസ്രായിലി, സൗദി ഇന്റലിജന്‍സുകളുമായി ബന്ധപ്പെട്ട ചാരശൃംഖലയിലെ ഭാഗമായിരുന്നുവെന്ന് പറഞ്ഞ കോടതി 17 പേര്‍ക്കും വധശിക്ഷ വിധിച്ചു. ഇവര്‍ക്ക് ഫയറിംഗ് സ്‌ക്വാഡ് പരസ്യമായി വെടിവെച്ചാണ് ശിക്ഷ നടപ്പാക്കുക.
ഒരു വനിത അടക്കം രണ്ടു പേരെ കോടതി പത്തു വര്‍ഷം വീതം തടവിന് ശിക്ഷിച്ചു. മറ്റൊരു പ്രതിയെ കുറ്റവിമുക്തനാക്കി. ശനിയാഴ്ചത്തെ വിധിയില്‍ അപ്പീല്‍ നല്‍കാവുന്നതാണെന്ന് ശിക്ഷിക്കപ്പെട്ട ചില പ്രതികളെ പ്രതിനിധീകരിക്കുന്ന അഭിഭാഷകന്‍ അബ്ദുല്‍ബാസിത് ഗാസി പറഞ്ഞു. 2024-2025 കാലയളവില്‍ യെമനുമായി ശത്രുത പുലര്‍ത്തുന്ന സാഹചര്യത്തില്‍ വിദേശ രാജ്യങ്ങള്‍ക്കു വേണ്ടി ചാരവൃത്തി നടത്തിയെന്നാണ് പ്രതികള്‍ക്കെതിരെ ചുമത്തിയിരിക്കുന്ന കുറ്റമെന്ന് സബ റിപ്പോര്‍ട്ട് ചെയ്തു.
സൗദി അറേബ്യ, ബ്രിട്ടന്‍, അമേരിക്ക എന്നിവിടങ്ങളില്‍ നിന്നുള്ള ഇന്റലിജന്‍സ് ഉദ്യോഗസ്ഥരുമായും ഇസ്രായിലിന്റെ മൊസാദ് ഇന്റലിജന്‍സ് സര്‍വീസുമായും പ്രതികള്‍ സഹകരിച്ചുവെന്ന് പ്രോസിക്യൂട്ടര്‍മാര്‍ പറഞ്ഞതായി സബ റിപ്പോര്‍ട്ട് ചെയ്തു. പ്രതികള്‍ ഡസന്‍ കണക്കിന് സ്ഥലങ്ങളെയും രാഷ്ട്ര നേതാക്കളുടെ നീക്കങ്ങളെയും കുറിച്ചുള്ള വിവരങ്ങളും മിസൈലുകളെ കുറിച്ചുള്ള വിവരങ്ങളും ശത്രുക്കള്‍ക്ക് നല്‍കി. ഇത് ഏതാനും സൈനിക, സുരക്ഷാ, സിവിലിയന്‍ കേന്ദ്രങ്ങള്‍ ലക്ഷ്യമിട്ട് ആക്രമണങ്ങള്‍ നടത്തുന്നതിലേക്ക് നയിച്ചു. ഇത് ഡസന്‍ കണക്കിന് പേരുടെ മരണത്തിനും അടിസ്ഥാന സൗകര്യങ്ങള്‍ വ്യാപകമായി നശിക്കാനും കാരണമായി – സബ റിപ്പോര്‍ട്ട് ചെയ്തു.
ഹൂത്തികള്‍ തങ്ങളുടെ നിയന്ത്രണത്തിലുള്ള യെമന്‍ പ്രദേശങ്ങളില്‍ വര്‍ഷങ്ങളായി നടത്തുന്ന അടിച്ചമര്‍ത്തല്‍ നടപടികളിലെ ഏറ്റവും പുതിയ വിധിയാണിത്. 2014 ല്‍ ആരംഭിച്ച യെമന്‍ ആഭ്യന്തര യുദ്ധത്തില്‍ ഇറാന്‍ പിന്തുണയുള്ള ഹൂത്തി വിമതര്‍ ജൂണില്‍ കസ്റ്റഡിയിലെടുത്ത യു.എന്‍ ജീവനക്കാര്‍ ഉള്‍പ്പെടെ ആയിരക്കണക്കിന് ആളുകളെ തടവിലാക്കിയിട്ടുണ്ട്. കഴിഞ്ഞ രണ്ട് വര്‍ഷത്തിനിടയില്‍, ഐക്യരാഷ്ട്രസഭക്കും അന്താരാഷ്ട്ര സഹായ ഗ്രൂപ്പുകള്‍ക്കും വിദേശ എംബസികള്‍ക്കുമായി പ്രവര്‍ത്തിക്കുന്നവരെ കേന്ദ്രീകരിച്ചുള്ള അടിച്ചമര്‍ത്തലില്‍ വിമതര്‍ ഡസന്‍ കണക്കിന് ആളുകളെ കസ്റ്റഡിയിലെടുത്തിട്ടുണ്ട്. തെളിവില്ലാതെ അവര്‍ ചാരന്മാരാണെന്ന് വിമതര്‍ ആവര്‍ത്തിച്ച് ആരോപിച്ചു. ഈ ആരോപണങ്ങള്‍ ഐക്യരാഷ്ട്രസഭ ശക്തമായി നിഷേധിക്കുന്നു.
സന്‍ആയിലെയും യെമനിലെ മറ്റ് ഹൂത്തി നിയന്ത്രണത്തിലുള്ള പ്രദേശങ്ങളിലെയും കോടതികള്‍ സൗദി നേതൃത്വത്തിലുള്ള സഖ്യസേനയുമായി സഹകരിച്ചതിന് കുറ്റാരോപിതരായവര്‍ക്ക് മുമ്പ് കഠിനമായ ശിക്ഷകള്‍ നല്‍കിയിരുന്നു. 2018 ഏപ്രിലില്‍ സൗദി നേതൃത്വത്തിലുള്ള സഖ്യസേന നടത്തിയ വ്യോമാക്രമണത്തില്‍ മുതിര്‍ന്ന ഹൂത്തി നേതാവായ സ്വാലിഹ് അല്‍സമദ് കൊല്ലപ്പെട്ട കേസില്‍ കുറ്റക്കാരാണെന്ന് കണ്ടെത്തിയ ഒമ്പത് പേരെ 2021 സെപ്റ്റംബറില്‍ വിമതര്‍ വധശിക്ഷക്ക് വിധേയരാക്കി.
ഗാസ യുദ്ധത്തില്‍ പലസ്തീനികളോട് ഐക്യദാര്‍ഢ്യം പ്രഖ്യാപിച്ച് 2023 അവസാനത്തോടെ ഹൂത്തി വിമതര്‍ ഇസ്രായിലിനും ചെങ്കടലിലെ കപ്പലുകള്‍ക്കും നേരെ മിസൈല്‍, ഡ്രോണ്‍ ആക്രമണങ്ങള്‍ ആരംഭിച്ചു. ഇതിന് മറുപടിയായി യു.എസും ഇസ്രായിലും ഹൂത്തികള്‍ക്കെതിരെ വ്യോമ, നാവിക ആക്രമണങ്ങള്‍ ആരംഭിച്ചു. ഈ വര്‍ഷാദ്യം നടന്ന ഇസ്രായിലി ആക്രമണത്തില്‍ വിമത സര്‍ക്കാരിന്റെ പ്രധാനമന്ത്രിയും മന്ത്രിസഭയിലെ ഭൂരിഭാഗം അംഗങ്ങളും കൊല്ലപ്പെട്ടിരുന്നു.